ءبىر قۋانتارلىعى, بيىلعى بايگەدە تەك ەلىمىزدىڭ عانا ەمەس, اقش, گەرمانيا, ۋكراينا, رەسەي, يزرايل جانە بەلورۋس ەلىندە تۇراتىن اۆتورلار دا باعىن سىناعان. جۇزدەن جۇيرىك شىعىپ جەڭىمپاز دەپ تانىلعان شىعارما اۆتورلارىن سالتاناتتى تۇردە ماراپاتتاۋ ءراسىمى الماتىداعى «Rixos Almaty» قوناقۇيىندە ءوتتى. ۇيىمداستىرۋشىلاردىڭ ايتۋىنشا «التىن قالام» جوباسىنىڭ دەڭگەيى جىل ساناپ ارتىپ كەلەدى.
– بيىلعى جۇلدە ءبىز ءۇشىن ەرەكشە بولدى. ولاي دەيتىن سەبەبىمىز, «الاش» پارتياسىنىڭ قۇرىلعانىنا ءجۇز جىل تولۋىنا وراي «الاشورداعا 100 جىل» اتالىمى جاريالاندى. ساتيرا جانرى بيىلدان باستاپ جازۋشى, ساتيريك, اۋدارماشى ەسەنجول دومباي اتىنداعى «جىلدىڭ ۇزدىك ساتيراسى» اتالىمى بولىپ وزگەرتىلدى. سونىمەن قاتار, بۇعان دەيىن 11 رەت وتكىزىلگەن بالالار جازۋشىلارىنا ارنالعان حالىقارالىق «دارابوز» بايقاۋى بيىل ءبىرىنشى رەت «التىن قالام» ادەبي جۇلدەسى اياسىندا ءوتىپ وتىر. بۇل بالالار شىعارماسىن قامتىعان تۋىندىلاردىڭ سانىن عانا ەمەس, ساپاسىنىڭ دا ارتۋىنا سەپتىگىن تيگىزدى. ءبىزدىڭ ارناۋلى سايت ارقىلى ءاربىر شىعارما ءوز وقىرمانىن تاپتى دەپ ەسەپتەيمىز – دەيدى «التىن قالام» ادەبي جۇلدەسىن ۇيىمداستىرۋ كوميتەتىنىڭ ديرەكتورى كەنجە جۇمان ۇلى.
بيىلدان باستاپ العاش رەت تاعايىندالعان قازاقتان شىققان العاشقى مەتسەناتتاردىڭ ءبىرى ەسەنقۇل مامانوۆ اتىنداعى سىيلىق الاشوردا تاقىرىبىن قامتىعان ۇزدىك شىعارمالارعا بەرىلدى. باس جۇلدەگە تىگىلگەن 1 ملن تەڭگەنى تاريحشى – جازۋشى ەلوردالىق ءامىرجان الپەيىسوۆ يەلەندى. ال, بالالار جازۋشىلارىنا ارنالعان «دارابوز» بايقاۋىنىڭ باس جۇلدەسى مەن 1 ملن تەڭگە كولەمىندەگى قارجىلاي سىياقى قاراعاندىلىق جازۋشى توكەن الجانتەگىنىڭ ەنشىسىنە بۇيىردى. «قازاق ادەبيەتىنە قوسقان ەلەۋلى ەڭبەگى ءۇشىن» سىيلىعى قازاقستاننىڭ حالىق جازۋشىسى شەرحان مۇرتازاعا بەرىلدى. سونداي-اق, «جىلدىڭ ۇزدىك پوەزياسى» اتالىمىندا الماتىلىق نۇرجان نۇربەك ۇزدىك دەپ تانىلسا, «جىلدىڭ ۇزدىك پروزاسى» اتالىمىندا وڭتۇستىكتىك قازاقستاندىق قارعاباي ماقسات دارا شىقتى. «جىلدىڭ ۇزدىك كينو ستسەناريى جانە دراماتۋرگياسى» سىيلىعىن شىمكەنتتىك جومارت ايداروۆ, «جىلدىڭ ۇزدىك ساتيراسى» لەڭگىرلىك ەرالحان جىلقىايدار ۇلىنا, «جىلدىڭ ۇزدىك فانتاستيكاسى» كەنتاۋلىق بەكبولات ورالبەكوۆكە بۇيىردى. ءدال وسىنداي اتالىمدار بويىنشا ارنايى سىيلىقتار ورىس ءتىلدى اۆتورلارعا دا تابىستالدى.
ەسكە سالساق, قازاقستانمەن قاتار الەمنىڭ 6 مەملەكەتىنىڭ جازۋشىلارى باق سىناعان بايقاۋعا شىعارمالار اقپان ايىنىڭ 15 مەن قىركۇيەكتىڭ 15 ارالىعىندا قابىلدانىپ, وقىرماندار وزىنە ۇناعان شىعارماعا عالامتور ارقىلى قازان ايىنا دەيىن داۋىس بەرگەن بولاتىن.
ارمان وكتيابر,
«ەگەمەن قازاقستان»
الماتى
